ཏོག་དབྱིབས་ནད་དུག་སྐབས་ཀྱི་འཕྲུལ་རིག་གསལ་འདེབས། 

ཏོག་དབྱིབས་ནད་དུག་སྐབས་ཀྱི་འཕྲུལ་རིག་གསལ་འདེབས། 

ད་ལྟ་ང་ཚོ་མང་ཆེ་བས་ཁྱིམ་དུ་ལས་ཀ་བྱེད་ཀྱི་ཡོད་སྟབས། ཟིན་བྲིས་འདིའི་ནང་དུ། ང་ཚོས་ཁྱིམ་དུ་སྒེར་གྱི་གསང་རྒྱ་དང་འབྲེལ་བའི་བདེ་འཇགས་ཀྱི་ལག་ལེན་ཡག་ཤོས་རིགས་ཇི་ལྟར་གོམས་འདྲིས་དང་ཉམས་སུ་ལེན་དགོས་མིན་གྱི་དྲི་བའི་སྐོར་ལ་གླེང་སློང་བྱེད་རྒྱུ་ཡིན། བོད་དོན་ལས་འགུལ་བསྟི་གནས་ཁང་གི་ལས་བྱེད་ཚོས་རང་ཁྱིམ་ནས་ལས་ཀ་བྱེད་སྐབས། བདེ་འཇགས་ཀྱི་གཞི་རྩ་བརྟན་པོ་ཞིག་བསྐྲུན་རྒྱུ་དེ། ལས་ཁུངས་རིམ་པའི་བདེ་འཇགས་ཀྱི་དྲ་བ་མ་ཡིན་པར། མི་སྒེར་རེ་རེ་ལ་ཐུག་ཡོད་པ་ཤེས་རྟོགས་བྱུང་ཡོད། 

ད་དུང་། Zoom ཟེར་བའི་གཟུགས་མཐོང་གླེང་མོལ་བཀོལ་ཆས་དེ། ཉེ་ལམ་མི་ཚོ་དྲ་ཐོག་ཏུ་འཛོམས་ཏེ་མཉམ་ལས་དང་གྲོས་བསྡུར་བྱ་སའི་སྡིངས་ཆ་གྲགས་ཆེ་ཤོས་དེ་ཆགས་ཡོད་པས། བཀོལ་ཆས་དེ་གསར་འགྱུར་ནང་དུ་ཡང་ཡང་ཐོན་ཡོད་ལ། དུས་མཚུངས་སུ། ང་ཚོའི་ཕྱག་སྦྲེལ་ཚོགས་པ་ “མི་སེར་ཚོད་ལྟ་ཁང”་( The Citizen Lab)ཐེ་བའི་ཉམས་ཞིབ་ཚོགས་པ་ཁག་གིས་བཀོལ་ཆས་དེའི་སྐོར་ལ་ཞིབ་བཤེར་བྱེད་འགོ་བཙུགས་ཡོད། གཟའ་འཁོར་སྔོན་མའི་གཟའ་པ་སངས་ཉིན། མི་སེར་ཚོད་ལྟ་ཁང་གིས་ནང་དོན་ཧ་ཅང་ཕུན་སུམ་ཚོགས་པའི་སྙན་ཐོ་ཁྱད་དུ་འཕགས་པ་ཞིག་བཏོན་ཡོད།  སྙན་ཐོ་དེའི་ནང་དུ་Zoom ནང་གི་ཉེར་སྤྱོད་བྱ་རིམ་ཨང་ཚབ་བདེ་འཇགས་མིན་པ་གསལ་ཁ་བཏོན་ཡོད་པ་མ་ཟད། Zoom བཟོ་ཚོང་ཁང་གི་ཉམས་ཞིབ་དང་ཡར་རྒྱས་ཀྱི་བྱེད་སྒོ་མང་ཆེ་བ་རྒྱ་ནག་ནང་དུ་རྩོམ་གྱི་ཡོད་པའི་གནས་ཚུལ་ཡོངས་ཁྱབ་དམར་རྗེན་དུ་བཏོན་ཡོད།

བོད་དོན་ལས་འགུལ་བསྟི་གནས་ཁང་གིས་དེ་སྔོན་  Zoom བཀོལ་ཆས་བཀོལ་སྤྱོད་བྱེད་ཀྱི་ཡོད་རུང་། ད་ཆ་དྲ་ལམ་གྱི་སྤྱིར་བཏང་གི་སྐད་ཆ་ཙམ་མ་གཏོགས། ཡོངས་ཁྱབ་ཀྱི་ཟབ་སྦྱོང་རིགས་ Zoom ནང་དུ་སྤྲད་མི་ཆོག་པ་བཟོས་ཡོད། དྲ་ལམ་གྱི་ཚོགས་འདུའི་རིགས་ Jitsi Meet ཟེར་བའི་ཁུངས་འབྱེད་མཉེན་ཆས་ཤིག་གི་ནང་དུ་གནས་སྤོར་བྱས་ཡོད། གནད་དོན་འདིའི་སྐོར་ལ་བོད་དོན་ལས་འགུལ་བསྟི་གནས་ཁང་གི་འཕྲུལ་ཆས་འགན་འཛིན་དང་གྷར་ཌིན་ལས་འཆར (Guardian Project )གྱི་མགོ་ཁྲིད་ན་ཐན་ཕི་རིས་ཊེས་ལགས་ཀྱིས་གླེང་སློང་བྱས་པའི་ལེ་ཚན་འདིར་གསན་རོགས། 

གསལ་འདེབས་སྙིང་བསྡུས།

༡༽  ད་ལྟ་ཁྱེད་རང་གི་ཁྱིམ་གྱི་དྲ་བ་དེ་ལས་ཀའི་དྲ་བ་ཆགས་ཡོད་སྟབས། མཉེན་ཆས་ཁག་གསར་སྣོན་དང་། སྐར་ཁུང་དང་ཀུ་ཤུ་མ་ལག་ཁོངས་ཀྱི་ཉེན་འགོག་ལྕགས་རི་ཁ་ཕྱེས་ཏེ། རང་ཉིད་དྲ་ཐོག་ཏུ་བདེ་འཇགས་ངང་གནས་ཐུབ་པ་བྱེད་རྒྱུ་དེ་གནད་འགག་ཅིག་ཆགས་ཡོད། 

༢༽  ཉྭ་འཛིན་གྱི་འབྲེལ་ཐག་དང་གནོད་ཚབས་ཆེ་བའི་ཟུར་སྣོན་རིགས་ལ་གཟབ་དགོས། ད་ལྟ་འཇབ་རྒོལ་འདིའི་རིགས་འབྱུང་བའི་ཉེན་ཁ་སྔར་ལས་ཆེ་བ་ཡོད། 

༣༽  ཁུངས་འབྱེད་མཉེན་ཆས་ལ་ཆ་བཞག་ན། མི་སྒེར་གྱི་ཁ་བརྡ་གླེང་མོལ་དང་། གཟུགས་མཐོང་གླེང་མོལ་སོགས་བྱེད་སའི་བདེ་འཇགས་ཀྱི་འབྲེལ་མཐུད་བརྟན་ཤོས་དེ། གསང་སྡོམ་གྱི་ཁྱད་ཆོས་ལྡན་པའི་བརྡ་རྟགས་བཀོལ་ཆས་ཆགས་ཡོད། Zoom བཀོལ་ཆས་ནི་བདེ་འཇགས་ཡོད་པའི་འབྲེལ་མཐུད་ཀྱི་ཡོ་ཆས་ཤིག་མིན། ཚོམས་ཀྱི་གཟུགས་མཐོང་གླེང་མོལ་བྱེད་སའི་གདམ་ག་འདྲ་མིན་གྱི་སྐོར་རྒྱས་པ་མཁྱེན་འདོད་ཚེ། གཤམ་ལ་གཟིགས།

༤༽  ཁྱེད་རང་གི་སྡོད་གནས་རྗེས་འདེད་དང་ཁ་པར་ནང་གི་འབྲེལ་ཐོ་རིགས་ལྐོག་ཏུ་བཀོལ་སྤྱོད་བྱེད་ངེས་པའི། ཏོག་དབྱིབས་ནད་དུག་འགོག་སྲུང་གི་ཆེད་དུ་བཟོས་པའི་བཀོལ་ཆས་ཁག་ལ་གཟབ་དགོས། རང་ཉིད་ཀྱིས་ཧ་གོ་བ་དང་སོ་སོས་ཡིད་ཆེས་བྱེད་སའི་ཐབས་ལམ་ཁག་བཀོལ་སྤྱོད་བྱོས། བསམ་མེད་ངང་ཆོག་མཆན་འདྲ་མིན་མ་སྤྲོད། 

ཁྱིམ་དུ་སྤོར་བའི་ལས་ཁུངས་ཀྱི་བདེ་འཇགས་སྲ་བརྟན་བཟོ་བའི་གོམ་པ་དང་པོ་ནི། རང་ཉིད་ཀྱི་ལས་ཀ་དང་འབྲེལ་བའི་ཁྱིམ་གྱི་འཕྲུལ་ཆས་དང་ཡོ་ཆས་རིགས་ལ་ཉེན་ཁ་ཡོད་ངེས་པ་ངོས་འཛིན་བྱེད་རྒྱུ་དེ་རེད། དེར་བརྟེན། བདེ་འཇགས་ནི། ཉེན་སྲུང་གི་མ་ལག་དང་། ཁེ་ལས་རིམ་པ། ཚོང་ལས་སྡེ་ཁག་གིས་བསྐྲུན་པའི་བདེ་འཇགས་ཀྱི་དྲ་བར་བརྟེན་མེད་པར། མི་སྒེར་རང་ཉིད་ལ་ཐུག་ཡོད། ད་ཆ་ཁྱིམ་གྱི་དྲ་བའི་སྟེང་དུ་ལས་ཀ་སྒྲུབ་མཁན་དང་། དྲ་བ་གང་ཞིག་ཁྱིམ་གྱི་ཡོ་ཆས་དང་སྦྲེལ་མཁན་ཚང་མར་ཆ་མཚོན་ན། འཕྲུལ་ཆས་རེ་རེར་འཇབ་རྒོལ་གྱི་ཉེན་ཁ་ཡོད་པར་ངོས་འཛིན་བྱེད་པའི་མ་དཔེ་དེ།  ཁ་ཡོད་ལག་ཡོད་ཆགས་ཡོད་ཀྱི་དོན་གནད་ཅིག་ཆགས་ཡོད།  གལ་ཏེ། ཁྱེད་རང་དྲ་སྟེང་དུ་ནད་འབུ་འགོས་ཡོད་པའི་འཕྲུལ་ཆས་ཤིག་ལ་ཐད་ཀར་སྦྲེལ་ཡོད་ཚེ། ཁྱེད་ཀྱི་གློག་ཆས་ལའང་ནད་འབུ་འགོ་བའི་ཉེན་ཁ་ཡོད་སྲིད་པ་དེ་དྲན་པར་བྱོས། 

རང་ཉིད་ཀྱི་བདེ་འཇགས་སྲ་བརྟན་བཟོ་བའི་གོམ་པ་དང་པོ་ནི། ག་དུས་ཡིན་ཡང་། ཁྱེད་ཀྱི་ཡོ་ཆས་ནང་གི་མཉེན་ཆས་ཁག་དུས་ཐོག་ཏུ་གསར་སྣོན་བྱས་ཡོད་པ་དང་། སྐར་ཁུང་དང་ཀུ་ཤུ་རྩིས་འཁོར་ནང་གི་ཉེན་སྲུང་ལྕགས་ཡོད་ཁ་ཕྱེས་ཏེ་ནུས་ཡོད་བཟོས་ཡོད་པ་ཁག་ཐེག་བྱེད་རྒྱུ་དེ་རེད། ལག་ལེན་འདིས་དྲ་བའི་སྟེང་དུ་མཐུད་ཡོད་པའི་ཡོ་ཆས་གཞན་པ་བརྒྱུད་ནས། ཁྱེད་རང་གི་རྩིས་འཁོར་ནང་དུ་སླེབས་ངེས་པའི་ཉེན་ཁའི་རིགས་ཞི་འཇམ་དུ་གཏོང་ཐུབ། 

གཉིས་པ། མ་མནན་གོང་ལ་བསམ་བློ་ཐོངས། ང་ཚོས་ནན་བཤད་བྱས་ནས་ཞུ་རྒྱུ་ཞིག་ལ། ད་ལྟའི་དུས་སྐབས་འདིར། ཁྱེད་ལ་ཡིག་ཟམ་ནང་དུ་ཟུར་སྣོན་དང་(དཔེར་ན། ཁྱེད་རང་གི་བྱིས་པའི་དགེ་རྒན་གྱི་ཕྱོགས་ནས) རེ་ལྟོས་མ་བྱས་པའི་ཡིག་ཆ་(ཁྱེད་རང་སྒེར་གྱི་སྨན་པའི་ལས་ཁུངས་ནས་བསྐུར་བའི་འཕྲོད་བསྟེན་གྱི་གནས་ཚུལ)་སོགས་སྔར་ལས་མང་བ་འབྱོར་གྱི་ཡོད་སྲིད་པས། ཟུར་སྣོན་ཁ་འབྱེད་སྐབས་དང་། འབྲེལ་ཐག་གི་སྒང་གི་བསྣུན་སྐབས་སུ། ངེས་པར་དུ་གཟབ་གཟབ་བྱེད་དགོས་ལ། དེ་དག་གི་སྒང་དུ་མ་མནན་གོང་། བསྐྱར་དུ་བསམ་བློ་གཏོང་དགོས།  གལ་ཏེ། ཁྱེད་ཀྱིས་ཇི་མེལ་ཡིག་ཟམ་བཀོལ་སྤྱོད་བྱེད་ཀྱི་ཡོད་ཚེ། ཁྱེད་རང་གི་ཡིག་ཟམ་ནང་དུ་འབྱོར་བའི་ཟུར་སྣོན་ཚང་མ་གྷོ་གྷིལ་སྐུལ་ཆས (Google Drive) ཀྱི་ནང་དུ་ཉར་ཚགས་བྱེད་ཆོག་པ་མ་ཟད། ཁྱེད་རང་གི་ཡོ་ཆས་ཀྱི་སྟེང་ནས་ཁ་འབྱེད་རྒྱུའི་ཚབ་ཏུ། དེ་དག་གྷོ་གྷིལ་སྐུལ་ཆས་ཀྱི་ནང་དུ་ཁ་འབྱེད་ཆོག  

སྤྱིར་བཏང་གི་འབྲེལ་ཐག་དང་། གླེང་མོལ་ནང་དུ་མགྲོན་འབོད་བྱེད་སྤྱད་ཀྱི་འབྲེལ་ཐག་རིགས་བརྒྱུད་སྐུར་བྱས་པའི་ཉེར་ལེན་ལ་བརྟེན་ནས་བྱུང་བའི་ཉེན་ཁ་དང་སེམས་འཚབ་རིགས་ད་དུང་སྔར་བཞིན་མུ་མཐུད་ནས་གནས་ཡོད། གཟབ་གཟབ་བྱོས།  དྲ་ཐོག་གི་ཉེས་ཅན་པས་ཁྱེད་རང་གི་གནས་ཚུལ་རྐུ་བར་འབད་རྩོལ་བྱེད་ཀྱི་ཡོད་པས། ད་ཆ། Zoom ་མགྲོན་འབོད་ཀྱི་འབྲེལ་ཐག་རྫུན་མ་དང་། དེ་བཞིན། ཉྭ་འཛིན་གྱི་འཇབ་རྒོལ་རིགས་ཀྱི་གྲངས་ཀ་ཡར་འཕར་བཞིན་ཡོད། 

གསལ་འདེབས་གཞན་པ་ཞིག   གལ་ཏེ། ཁྱེད་རང་གྷོ་གྷིལ་གྱི་ཁོར་ཡུག་ཅིག་གི་ནང་དུ་ལས་ཀ་སྒྲུབ་ཀྱི་ཡོད་ཚེ། ཁྱེད་རང་གི་མ་ལག་བཙན་པོ་དང། ཐོན་གསར་བ་ཡིན་པའི་ཁག་ཐེག་བྱེད་པར། Chromebook རྩིས་འཁོར་དེ། ད་ཆའི་ཆར་གདམ་ག་ཡག་པོ་ཞིག་ཆགས་ཡོད། བདེ་འཇགས་ཀྱི་ཆ་ནས། Chromebook རྩིས་འཁོར་དེ་སྟབས་བདེ་བའི་ཐབས་ལམ་ཡག་ཤོས་དེ་ཡིན། དེ་བཞིན། སྐར་ཁུང་མ་ལག ༡༠་དང་། ཀུ་ཤུ་རྩིས་འཁོར་གྱི་མ་ལག་ཐོན་གསར་བའི་ཐོག་ཏུ་བསྒྱུར་ཡོད་ཚེ། དེ་གཉིས་ཀྱང་བདེ་འཇགས་ཡིན། འོན་ཀྱང་། ཁྱེད་ཀྱིས་རང་ཉིད་ཀྱི་རྩིས་འཁོར་ནང་དུ་ཟུར་སྣོན་མང་པོ་ཕབ་ལེན་བྱེད་ཀྱི་ཡོད་ཚེ། དྲ་ཐོག་གི་འཇབ་རྒོལ་ཐེབས་པའི་ཉེན་ཁ་ཆེན་པོ་ཡོད། 

གསུམ་པ།  བརྒྱུད་སྐུར་མ་བྱས་གོང་དུ་བསམ་བློ་ཐོངས། འཕྲུལ་རིག་དང་འབྲེལ་བའི་གནས་ཚུལ་དང་ཏོག་དབྱིབས་ནད་དུག་སྐོར་གྱི་གསར་འགྱུར་སོགས་བརྒྱུད་སྐུར་བྱེད་སྐབས་ཡིད་གཟབ་བྱེད་དགོས། བོད་མིའི་སྤྱི་ཚོགས་ཁྲོད་དུ་ཁྱབ་སྤེལ་འགྲོ་བཞིན་པའི་གནས་ཚུལ་རྫུན་མ་ཟེར་བའི་བློ་བཟང་ལགས་ཀྱི་ཟིན་བྲིས་འདི་ཀློག་རོགས། 

མཐའ་མར། ཁེ་སི་ཕར་སི་ཀའེ་( Kaspersky)་དྲ་རྒྱའི་བདེ་འཇགས་བཟོ་ཚོང་ཁང་གིས་བོད་ཀྱི་ཆུ་ཁུང་འཇབ་རྒོལ་(Tibetan waterhole attacks)ཟེར་བའི་སྙན་ཐོ་ཞིག་བཏོན་ཡོད། སྙན་ཐོ་དེའི་ནང་དུ། ནད་འབུ་འགོས་ཡོད་པའི་དྲ་ཚིགས་གང་རུང་ལྟ་ཀློག་བྱས་ཚེ། རང་ཉིད་ཉེན་ཁའི་གནས་སུ་བསྐྱལ་ངེས་པ་གསལ་སྟོན་བྱས་ཡོད། ཁེ་སི་ཕར་སི་ཀའེ་བཟོ་ཚོང་ཁང་གིས། བོད་ཀྱི་གནད་ཡོད་དྲ་ཚིགས་གང་མང་ཞིག་ལ། ཕྱི་ལོ་༢༠༡༩་ལོའི་ཟླ་༥་ནས་བཟུང་ནད་འབུ་འགོས་ཡོད་པའི་གནས་ཚུལ་སྤེལ་ཡོད། 

གནས་སྟངས་འདི་འདྲའི་ཁྲོད་དུ། མི་སྒེར་ཞིག་གིས་ག་རེ་བྱེད་ཐུབ་མིན་ནི་དྲི་བ་ཆེན་པོ་ཞིག་ཡིན། བསྐྱར་དུ་ཞུ་རྒྱུར། སྒུག་ནས་མ་སྡོད། གསར་སྣོན་བྱོས་དང་། མ་མནན་སྔོན་ལ་བསམ་བློ་ཐོངས་གཉིས་ནི་སྲུང་སྐྱོབ་ཀྱི་ཐབས་ལམ་ཡག་ཤོས་དེ་ཡིན། དཔེར་ན། ཁྱེད་རང་གིས་ལྟ་ཀློག་བྱེད་སའི་དྲ་ཚིགས་དེས། Flash plugin ཁ་སྣོན་ཡོ་ཆས་དང་གསར་སྣོན་རིགས་ཕབ་ལེན་བྱེད་པའི་རེ་སྐུལ་བྱེད་ཀྱི་ཡོད་ཚེ།  རེ་སྐུལ་དེ་དག་གི་སྒང་དུ་མ་མནན་གོང་། དེ་སྔོན་དྲ་ཚིགས་དེར་ལྟ་སྐབས་ཆ་རྐྱེན་དེ་འདྲ་མི་དགོས་ཀྱང་། ད་ཆ་དགོས་དོན་ག་རེ་ཡིན་ནམ་ཞེས་རང་ཉིད་ལ་དྲི་བ་འདྲི་དགོས།  བསྐྱར་དུ་འཕྲུལ་རིག་གི་གཟུངས་སྔགས་དེ་ཡིད་ལ་དྲན་པར་བྱོས། ༼རང་ཉིད་ཀྱི་རྩིས་འཁོར་མ་ལག་གནས་སྣོན་བྱོས། མ་བསྣུན་གོང་ལ་བསམ་བློ་ཐོངས།༽

དེ་ནས་ད་ལྟའི་དྲི་བ་གཙོ་བོ་ཞིག་ནི། བོད་པའི་སྤྱི་ཚོགས་ཁྲོད་ཀྱི་ཚོགས་པ་མང་དག་ཅིག་གིས་བཀོལ་སྤྱོད་བྱེད་བཞིན་ཡོད་པ་གང་ཞིག་ལ། ད་ཆ་སྔར་ལས་མང་བ་བཀོལ་སྤྱོད་བྱེད་ཀྱི་ཡོད་སྲིད་པའི་འབྲེལ་མཐུད་ཀྱི་ཡོ་ཆས་རིགས། དཔེར་ན། Zoom དང་Slack སོགས་ལ་བདེ་འཇགས་ཡོད་མེད་ཀྱི་སྐོར་དེ་ཡིན།

གཅིག་བྱས་ན། ཁྱེད་ཀྱིས་Zoom ནང་གི་མི་གཉིས་བར་གྱི་གཟུགས་མཐོང་གླེང་མོལ་གྱི་བརྒྱུད་རིམ་ལ་གསང་སྡོམ་གྱི་ཁྱད་ཆོས་མཁོ་སྤྲོད་བྱེད་ཀྱི་ཡོད་མེད་སྐོར་གྱི་གསར་འགྱུར་དེ་གོ་ཐོས་བྱུང་ཡོད་སྲིད། མི་སེར་ཚོད་ལྟ་ཁང་གི་ཉམས་ཞིབ་ཀྱི་སྙན་ཐོར་གཞིར་བཞག་ནས་ཐག་གཅོད་བྱུང་བའི་ང་ཚོའི་མཐའ་སྡོམ་ནི། Zoom ནང་དུ། སྤུས་དག་ཅིང་ཡིད་བརྟན་འཕེར་བའི་བརྙན་ལམ་གྱི་ཆ་འཕྲིན་མཁོ་སྤྲོད་བྱེད་ཀྱི་ཡོད་ཀྱང་། སྲོལ་རྒྱུན་གྱི་ཁ་པར་གཏོང་ལེན་གྱི་མི་མང་གི་མཉམ་འདུས་གླེང་མོལ་གྱི་ཚོགས་འདུ་ལྟ་བུའི་རིགས་བདེ་འཇགས་མིན།  མི་མང་པོ་ཞིག་དུས་མཉམ་གཅིག་ཏུ་གཟུགས་མཐོང་གླེང་མོལ་གྱི་ནང་དུ་བསྐོང་ཐུབ་པ་གང་ཞིག་ལ། ཚོགས་འདུའི་ནང་དུ་ཞུགས་མི་ཚོས་ཐོ་འགོད་དང་། སྒེར་གྱི་གནས་ཚུལ་གང་ཡང་ཡར་འཇུག་བྱེད་མ་དགོས་པར་མཉམ་ཞུགས་བྱེད་ཆོག་པ་དེ་ནི། མི་ཚོགས་སྐོང་བྱེད་ཀྱི་ལམ་ཁ་ཡག་པོ་ཞིག་ཡིན། འོན་ཀྱང་། Zoom ནང་གི་སྣེ་གཉིས་བར་གྱི་གསང་སྡོམ་གྱི་ཁྱད་ཆོས་མཁོ་སྤྲོད་བྱེད་ཀྱི་ཡོད་ཟེར་བའི་བསྒྲགས་གཏམ་དེ་རྫུན་མ་རེད། 

ན་ཐན་ལགས་ཀྱིས་རྒྱང་བསྲིངས་ལེ་ཚན་ནང་དུ་འགྲེལ་བཤད་བསྐྱོན་པ་ལྟར།  འཛོམས་ནང་གི་སྣེ་གཉིས་བར་གྱི་གསང་སྡོམ་དེ་དབུས་ཀྱི་དབང་འཛིན་བྱེད་པོ་གཅིག་རང་གི་དོ་དམ་དང་འགྲེམས་སྤེལ་ལ་བརྟེན་ཡོད་པས། ལག་རྩལ་མཁས་པའི་འཇབ་རྒོལ་པ་དང་ཁྲིམས་ལུགས་ཚན་པས་ཁོང་ཚོའི་སྒྲོམ་གཞིའི་ནང་དུ་ལས་ཀ་བྱས་ཚེ། དེའི་ལྟ་བུའི་སྣེ་གཉིས་བར་གྱི་གསང་སྡོམ་བར་མཚམས་ནས་གཏོར་རྒོལ་དང་ཉམས་དམས་སུ་གཏོང་ཐུབ། གང་ཡིན་ཞེ་ན། མི་སྒེར་ཞིག་གིས་གསང་སྡོམ་གྱི་ལྡེ་མིག་དང་ཡང་ན། གཟུགས་མཐོང་མཉམ་འདུས་གླེང་མོལ་བདེ་འཇགས་ཡིན་མིན་བདེན་དཔང་དང་ཁག་ཐེག་བྱེད་པའི་ལམ་ཁ་མེད། དེའི་དོན་ནི། ཁྱེད་ཀྱི་གླེང་མོལ་གྱི་ནང་དོན་གསང་སྡོམ་བྱས་ཡོད་སྟབས། Zoom ནང་དུ་ཁྱེད་ཀྱིས་གང་བཤད་པ་ཐམས་ཅད་ཐོ་འགོད་དང་ཉར་ཚགས་བྱེད་ཀྱི་མེད། འོན་ཀྱང་། བརྡ་རྟགས (མི་གཉིས་བར་གྱི་གཟུགས་མཐོང་གླེང་མོལ)་དང་WhatsApp (མི་གཉིས་ནས་བཞི་བར་དུ་གཟུགས་མཐོང་གླེང་མོལ་བྱེད་ཆོག) གཉིས་ཀྱིས་མཁོ་སྤྲོད་བྱེད་བཞིན་ཡོད་པའི་ཡོ་ཆས་གཉིས་བར་གྱི་གསང་སྡོམ་དེ་མེད།  དཔེར་ན། བརྡ་རྟགས་ཀྱི་ནང་དུ། ཁ་པར་དང་རྩིས་འཁོར་རེ་རེའི་བར་གྱི་འབྲེལ་མཐུད་ཆ་ཚང་གསང་སྡོམ་བྱས་ཡོད་སྟབས། བརྡ་རྟགས་ཀྱི་དྲ་བའི་ཞབས་ཞུའི་ངོས་ནས་ཀྱང་། ཁྱེད་རང་གིས་གང་བཤད་པ་དག་ལྐོག་ལྟ་དང་ལྐོག་ཉན་བྱེད་མི་ཐུབ། FaceTime ནང་དུ་གསང་སྡོམ་མཁོ་སྤྲོད་བྱེད་ཀྱི་ཡོད་ཀྱང་། དེ་བཀོལ་སྤྱོད་བྱེད་པར། དང་ཐོག་ཁྱེད་ལ་ཀུ་ཤུ་ཁ་པར་དགོས་པ་མ་ཟད། དེ་ནི་ཁུངས་འབྱེད་མཉེན་ཆས་མིན་ལ། ཁེ་སྤོགས་ཀྱི་ཆེད་དུ་བཟོས་པའི་སྒེར་བདག་ཅན་གྱི་Zoom དང་ Slack ཆ་འདྲ་བས། བརྟན་པོ་ག་ཚོད་ཅིག་ཡོད་མེད་བཤད་དཀའ།

ཁུངས་འབྱེད་མཉེན་ཆས་ཀྱི་འབྲེལ་མཐུད་ཞབས་ཞུའི་རིགས། དཔེར་ན། Jitsi Meet དང་། Matrix(དང་དེའི་རིན་མེད་ཀྱི་བཀོལ་ཆས་Riot) ལྟ་བུའི་མཉེན་ཆས་ཀྱི་ཨང་ཚབ་དང་བྱེད་ལས་ཁག་ལ་མངོན་ལྐོག་གི་ཆ་གང་ཡང་མེད་པར། ཆ་ཚང་ཕྱི་གསལ་ནང་གསལ་ཡིན། དྲ་ཚིགས་ཤིག་དང་འདྲ་བར། དྲ་བའི་ཞབས་ཞུ་སྒྲིག་བཟོ་བྱེད་ཤེས་མཁན་གྱི་མི་སུ་འདྲ་ཞིག་ཡིན་རུང་དེ་གཙོ་སྐྱོང་བྱེད་ཆོག   ཁྱེད་ཀྱིས་གྷར་ཌིན་ལས་འཆར་གྱི་རྒྱང་བསྲིངས་ལེ་ཚན་གསར་ཤོས་དེ་བརྒྱུད་ནས། གནད་དོན་དེའི་སྐོར་དང་། ཁུངས་འབྱེད་མཉེན་ཆས་ཀྱི་བརྙན་ལམ་དང་སྐད་སྒྲའི་ཚོགས་འདུའི་སྐོར་ལ་མང་བ་གསན་ཆོག 

གནས་ཚུལ་གནད་བསྡུས་བྱས་ན། གལ་ཏེ་ཁྱེད་ལ་གསང་རྒྱ་དགོས་ཚེ།   གཞན་ལ་ཁ་པར་གཏོང་བ་དང་། མི་གཉིས་བར་གྱི་གཟུགས་མཐོང་གླེང་མོལ་རིགས་བརྡ་རྟགས་བཀོལ་ཆས་ནང་དུ་འགོ་འཛུགས་བྱོས། གལ་ཏེ་ཚོགས་པའི་ཁ་བརྡ་དང་གཟུགས་མཐོང་མཉམ་འདུས་གླེང་མོལ་བྱེད་འདོད་ཚེ། ང་ཚོའི་ངོས་ནས།  ཁུངས་འབྱེད་མཉེན་ཆས་ཀྱི་གདམ་གའི་རིགས། དཔེར་ན། Jitsi Meet དང་། Matrix དྲ་བའི་སྟེང་གི་རིན་མེད་ཀྱི་བཀོལ་ཆས་Riot་ལྟ་བུ་བཀོལ་སྤྱོད་བྱེད་པའི་རེ་སྐུལ་བྱེད་ཀྱི་ཡོད། 

གྷར་ཌིན་ལས་འཆར་དང་མཉམ་འབྲེལ་བྱེད་བཞིན་པའི་བོད་ཀྱི་གློག་ཀླད་ཛ་དྲག་གྲ་སྒྲིག་ཚན་ཁག་བརྒྱུད་དེ། བོད་དོན་ལས་འགུལ་བསྟི་གནས་ཁང་གིས་Jitsi Meet སྒྲིག་བཟོ་བྱེད་པའི་ལས་ཀ་སྒྲུབ་བཞིན་ཡོད། དེའི་དོན་ནི། ང་ཚོས་དྲ་བའི་ཞབས་ཞུ་ཞིག་ཁ་འབྱེད་པ་དང་སྒོ་བརྒྱབ་ཐུབ་པའི་ཐོག་ནས་Jitsi་ལས་ཀ་རྩོམ་དུ་འཇུག་ཐུབ་པས། བདེ་འཇགས་འགན་ལེན་དང་ཁག་ཐེག་བྱེད་ཐུབ། གལ་ཏེ། ཁྱེད་རང་གིས་འདིའི་སྐོར་ལ་མང་བ་མཁྱེན་འདོད་པའམ། ཁྱེད་རང་ཉིད་ཀྱིས་Jitsi Instance སྒྲིག་བཟོ་བྱེད་ཕྱོགས་སྐོར་སྦྱང་འདོད་ཡོད་ཚེ། བོད་ཀྱི་གློག་ཀླད་ཛ་དྲག་གྲ་སྒྲིག་ཚན་ཁག་ལ་འབྲེལ་བ་བྱེད་ཆོག  [email protected].ང་ཚོས་བོད་ཀྱི་ཚོགས་པ་ཁག་ལ་དྲ་བའི་ཞབས་ཞུ་འདིའི་སྐོར་ངོ་སྤྲོད་བྱེད་པའི་ཆེད་དུ། ང་ཚོའི་ངོ་ཤེས་པའི་ཚོགས་པ་རེ་རེར་འབྲེལ་གཏུགས་བྱེད་ངེས་ཡིན། གང་ཡིན་ཞེ་ན། ཚོགས་པ་ཁག་གི་ལས་ཀ་གལ་ཆེན་རིགས་མུ་མཐུད་ནསབསྒྲུབ་པར། བརྙན་ལམ་གླེང་མོལ་གྱི་སྡིངས་ཆ་བརྟན་པོ་ཞིག་དགོས་ཀྱི་ཡོད། 

ང་ཚོའི་གསལ་འདེབས་མཐའ་མ། གལ་ཏེ། ཁྱེད་རང་ལ་ནད་དུག་ཕོག་ཚེ། མང་ཚོགས་ཀྱི་འཕྲོད་བསྟེན་ལྟ་སྐྱོང་མི་སྣས་ཁྱེད་རང་དང་ཁྱེད་རང་གི་སྡོད་གནས་རྗེས་འདེད་གཏོང་ཐུབ་པའི་ཆེད་དུ་བཟོས་པའི་མཉེན་ཆས་གསར་བའི་རིགས་ལ་དོགས་ཟོན་བྱེད་དགོས། མཉེན་ཆས་དེ་དག་ཁྱེད་རང་གི་ས་གནས་སུ་ཁྱབ་སྤེལ་འགྲོ་བཞིན་པའི་ནད་དུག་སྐོར་གྱི་གནས་ཚུལ་གལ་ཆེན་ཁག་བསྡུ་ལེན་བྱེད་པའི་ཆེད་དུ་ཡིན། འོན་ཀྱང་། མཉེན་ཆས་འདིའི་རིགས་ལ་འདྲི་དཔྱོད་དང་དབྱེ་ཞིབ་མང་པོར་མེད་པའི་ཐོག་ནས་དྲ་ལམ་དུ་མགྱོགས་པོར་སླེབས་ཡོང་གི་ཡོད་ལ། དུས་ད་ལྟའི་ཆར། སྲིད་གཞུང་མང་པོ་ཞིག་གིས་མཉེན་ཆས་དེ་དག་མི་མང་གིས་བཀོལ་སྤྱོད་བྱེད་དགོས་པའི་རེ་སྐུལ་ཞུ་ཡི་ཡོད་རུང་། དེས་ག་ཚོད་ཅིག་ཕན་གྱི་ཡོད་མེད་གསལ་པོ་མེད། 

ངེས་པར་དུ་སེམས་ལ་དྲན་དགོས་པའི་གནད་དོན་གལ་ཆེན་ཞིག་ནི།  ཁྱེད་ཀྱིས་མཉེན་ཆས་གང་རུང་ཞིག་ལ་སྤྲད་པའི་ཆོག་མཆན་བརྒྱུད་ནས། མཉེན་ཆས་དེས་ཁྱེད་རང་གི་སྡོད་གནས་རྗེས་འདེད་གཏོང་ཐུབ་པ་དང་ཁ་པར་ནང་གི་འབྲེལ་ཐོ་སོགས་རག་ཐུབ་ཀྱི་ཡོད་པ་དེ་ཡིན། ང་ཚོས་མང་ཚོགས་ཀྱི་འཕྲོད་བསྟེན་དང་འབྲེལ་བའི་ཐོབ་ཐང་གཙིགས་སུ་བཟུང་འདོད་ཀྱང་། དེའི་ཆེད་དུ་སྒེར་གྱི་གསང་རྒྱ་བློས་གཏོང་མི་ཐུབ། 

རྗེས་འདེད་གཏོང་བྱེད་ཀྱི་མཉེན་ཆས་བེད་སྤྱོད་ཡག་པོ་གཏོང་བཞིན་པའི་ད་ལྟའི་དཔེ་མཚོན་ཡག་པོ་ཞིག་ནི། སིང་གྷ་ཕོར་སྲིད་གཞུང་གིས་བཟོས་པའི་མཉམ་དུ་རྗེས་འདེད་(Trace Together)་ཟེར་བའི་མཉེན་ཆས་དེ་ཡིན། གཞི་གྲངས་རིགས་དྲ་སྟེང་དུ་མ་ཉར་བའི་ཐོག་ནས། ཁྱེད་ཀྱི་ཉེ་འགྲམ་དུ་མཉེན་ཆས་དེ་བཀོལ་སྤྱོད་བྱེད་མཁན་ཡོད་ཚེ། མི་དེ་དག་ངོས་འཛིན་བྱེད་ཐུབ་ཀྱི་ཡོད།  གལ་ཏེ། མི་ཚང་མས་མཉམ་དུ་རྗེས་འདེད་ཟེར་བའི་མཉེན་ཆས་དེ་མཉམ་དུ་བཀོལ་སྤྱོད་བྱེད་ཀྱི་ཡོད་ཚེ། ཁྱེད་ཀྱིས་སོ་སོའི་ཉེ་འགྲམ་གྱི་མི་མང་པོ་ཞིག་གི་ཐོ་གཞུང་ཕྱོགས་བསྡུས་བྱེད་ཐུབ། དེ་ནས། ཁྱེད་ལ་ཏོག་དབྱིབས་ནད་དུག་འགོས་ཚེ། ཐོ་གཞུང་ནང་གི་མི་དེ་དག་བཙལ་ཏེ། ཁོང་ཚོར་ཡང་ནད་དུག་འགོས་ཡོད་སྲིད་པའི་བརྡ་ལན་ཕུལ་ཆོག  

གལ་ཏེ། ཁྱེད་ཀྱིས་འདིའི་སྐོར་དང་བདེ་འཇགས་ཡོད་པའི་རྗེས་འདེད་ཀྱི་མཉེན་ཆས་རིགས་ཀྱི་གདམ་གའི་སྐོར་ལ་མང་བ་མཁྱེན་འདོད་ཡོད་ཚེ།  ཡང་བསྐྱར། ན་ཐན་ལགས་ཀྱི་རླུང་འཕྲིན་ལེ་ཚན་ལ་གསན་རོགས། 

མདོར་བསྡུས་ན།  ཁྱེད་རང་ཁྱིམ་དུ་བསྡད་དེ་ལས་ཀ་བསྒྲུབ་ཀྱི་ཡོད་པའམ།  སོ་སོ་རང་ཉིད་དང་རང་ཉིད་ཀྱི་ནང་མི་ཚོའི་བདེ་འཇགས་བརྟན་སྲུང་དང་འབྲེལ་བའི་གནས་ཚུལ་གལ་ཆེན་རིགས་རག་ཐུབ་པའི་ཆེད་དུ། འཕྲུལ་ཆས་ཀྱི་སྐོར་འཚོལ་ཞིབ་བྱེད་ཀྱི་ཡོད་ཚེ།  གསང་རྒྱ་དང་བདེ་འཇགས་གཙིགས་སུ་འཛིན་དགོས་རྒྱུ་དེ་ཡིད་ལ་དྲན་པར་བྱོས།  འཕྲུལ་རིག་བདེ་འཇགས་དང་འབྲེལ་མཐུད་ཀྱི་ལྟ་ཚུལ་ངོས་ནས་གླེང་ན། འདིས། ང་ཚོ་སྔར་ལས་སྟོབས་ཤུགས་ལྡན་པའི་ཐོག་ནས་ནད་དུག་གི་འཆང་རྒྱ་འདི་ལས་གྲོལ་ཐུབ་པར་རོགས་འདེགས་བྱེད་ངེས། 

མཐའ་མར། བོད་དོན་ལས་འགུལ་བསྟི་གནས་ཁང་གིས་མུ་མཐུད་ནས་གནས་ཚུལ་གསར་བ་རིགས་དུས་བསྟུན་ཁ་གསབ་བྱས་ཏེ། ཁྱེད་ལ་མཁོ་སྤྲོད་བྱེད་ངེས།

འཚོ་བའི་ཁྲོད་དང་དྲ་ལམ་གཉིས་ཀ་ནས་བརྟན་པོར་གནས་རོགས།

Leave a Reply

Your email address will not be published.

This site uses Akismet to reduce spam. Learn how your comment data is processed.

Stay informed. Stay empowered.

Sign up to our mailing list for critical insights on Tibet, technology, and advocacy straight to your inbox!

Top